DE SENECTUTE

Per vedere il video clicca sull'immagine

(da http://www.videotelecarnia.it/)

UN TOC DAL LIBRI “DE SENECTUTE” CHE NOL SARA’ MAI FINÎT

Mi inacuarç dome cumò e no rivi a rindimi cont di jessi rivât a l’etât dai miei vons. O ai passade l’etât di gno pari Checo, muart a 64 agns, dal pari di gno pari Bepo, muart a 56 agns di incident o di vendete, dal pari di mê mari Vigji Zuliani di Davai, muart a 53 agns di palmonite sfulminant.
O soi rivât plui in là di un luminâr come pre Bepo Machet, muart a 64 agns, e dal gno mestri e ispiradôr, pre Checo Placerean, muart prime di finî i 66 agns, lui che al veve fat
pôre ancje al taramot e al veve di vivi almancul fint a 96 agns, come une sô agne muinie. O ai passât, cence volê e cence nissune ilusion, personis sanis, fuartis, furtunadis. Mi
stoi svicinant galopant al limit che la bibie e met a la vite al om. “I agns de nestre vite a saressin setante, e otante pai plui fuarts, ma lambic e rude fadie a son la pluritât” (Sal
90, 10). Al è evident che no ai nissun titul di considerâmi tal mac dai fuarts, ancje se o crôt che e coventi plui fuarce a vivi cul mâl che a vivi cul ben. Forsit i debui no son cussì debui e i fuarts no son cussì fuarts. Parcè che e covente plui fuarce a vivi une vite interie segnade dal mâl fisic o
morâl che a vivi une vite facile, gratificant e umanementri furtunade. Par chel jo no premiarès mai chei che za la nature o la furtune ju à premiâts, ma chei che a scuegnin strissinâsi di une dì a chê altre cence fuarce, cence ilusions di sorte. Come che o ai scrit di cualchi bande, nol va premiât il sportîf che al svole vie gasât e imbombât di vitaminis e cuntune biciclete ultramoderne, ma che chel al va indenant porconant cuntune biciclete cence fanâl e cu lis gomis flapis. Chel al è un vêr campion! Rivât però a cheste etât mi sint stimolât a fâ une riflession sun cheste stagjon ultime de vite e su lis stagjons di prime e par viodi ce che inte mê esistence mi à judât, ce considerazions che o pues fâ, ce belanç tirâ. Mi zove a mi par fâmi lûs e al pues zovâ, o speri, ai tancj fradis e sûrs
che si cjatin a vivi chê Sierade che, no si sa ni cuant ni co, si tramudarà in Invier glaçât. La sperance o la sigurece par fede te resurezion e te eternitâ de vite e je une altre robe. E pues iluminâ la part finâl, risolutive e definitive de nestre vite, ma no eliminâlu cun ce che e compuarte. Une cierte pôre de muart, sore dut dal dolôr fisic, dal indebuliment dal cuarp e dal ridimensionament e apaniment des facoltâts che plui a coventaressin, il sens di un distac che nol sarà provisori o riparabil, la sparizion de lûs dal soreli, ma ancje de vision di amîs, de tô int plui cjare e je plui logjiche e serie de incussience di chel che no si rint cont o che nol vûl pensâ…
(pre Toni)