Sicuramenti la figure di chest preidi, massime tai ultims agns di vite, a reste problematiche encje parcè che, se a presente une vore di pregjos e di cualitâts come ch’i vin jodût parsôre, a manten e a pant plui di cualchi debolece, che dutcâs a no sminuis il peis globâl da personalitât di pre Toni. Une di chestes deboleces, seconti me, a è stade la so ostinade rivalitât cu la gjerarchie gleseastiche che, pur meretant dispes series critiches encje da bande dal scrivent, a conserve simpri il pregio di iessi l’uniche istituzion umane (e quindi cetant falibil) che à savût, ben o mâl, tignî dongje la Gleisie Catoliche in periodos cetant neris e dificî (la vessino i Luterans o i Ortodos!): se pre Toni al ves valutât miôr encje chest aspiet, forsit al vores vût plui misericordie par papes e vescui e mancul sigurece pas sôs opinions. Un ate forme di debolece a è stade la sô posizion di pacifist unilaterâl e di stenuo opositôr di dutes la declarazions uficiâls da Gleisie Catoliche in ambit etic (abort, eutanasie, muart) sessuâl ( matrimonis gay, copies di fat, uteros in afit, pirule dal dì dopo, maris-nones) morâl ( vuere, adozions, embrions, clonazion) come se la Gleisie , usance pre Toni, a no ves di impaçâsi encje dal om real di vuei ma a ves nome di restâ sierade in canoniche o in sacristie a dî rosaris e novenes, cence fâ sintî la sô vous autorevul (ma no autoritarie), massime in dì di vuei cun dut ce ch’and è pal mont e pal Italie, dulà che la nove religjion nichiliste a dete ogni dì su ducj i mass media l’agjende socio-politiche. Lassâ cjacarâ ducj su dut, ma stropâ la bocje a Gleisie (e al pape) che encje culturalmenti a nol temi confronts cun nissun e al à ce insegnâ a tancj di lôr. A è restade nome la Gleisie a scombati pal om: se a no foss dulà saressino bielzà rivâts? Un’ate debolece di pre Toni jò la cjati tal so mût di ricuardâ il so seminari cun chel libri che par me (e jal ai det e scrit plui voltes tai agns passâts) al è nome une impietose autopsie di un cadavar riesumât a passe 30 agns da muart, là che une autopsie a si à di fâle simpri cun cetante pietât sedinò a devente “vilipendio di cadavere”. E po: une autopsie a covente par capî las causes platades di une muart repentine o par indagâ a fin di ben une muart incomprensibil o ben par prontâ eventualmenti alc di rimedi pai vîs. Fâ une autopsie dopo 30 agns da muart a ce covente? A po coventâ al judiç, tratantsi di un delit; ma intun câs di muart naturâl (come chê dal seminari) a si po dî nome che al è un at culturalmenti inutil e praticamenti superfluo. Massime se in cheste ricognizion tardive a si esaltin nome i aspiets umans negatifs cence nomenâ mai chei, pous o trops, positifs. (dal Bollettino parrocchiale di Paluzza, Pasqua 2008)
O pretint une glesie perfete cuant che jo o soi l'imperfezion personificade (pre Toni)
Nessun commento:
Posta un commento