Fede come istint e fuarce di vivi. O ài vùt mut di intivami, in tai miei girs di torseon o singar romantic, in robis che mi àn fat unevore pensa. Passant dongje di cualchi maserie, o viodevi a spuntâ, framieç dai rudinaz, une rosute piçule, puare ma sane. Di une fressure di un vecjo mur o viodevi a cucâ fûr un frosc di jerbe o adiriture une plantute. Mi visi che, ogni volte che di Codroip, là che o eri capelan, o passavi par Visepente, il voli mi scjampave sù in te spice dal cjampanili, là che a erin nassuz e cressuz tre biei arbui, e o disevi: "La int no iu cognos, ma chei vespui lì e àn fiât di vendi a lâ a nassi lassù". Passant par une strade asfaltade, mi à capitât plui di une volte di viodi a cucâ fûr, dopo di vê sbusât l'asfalt, un biel çuf di tale de plui preseade. Ancje là che la int a bute ogni sorte di scovacis e porcariis o ài vût mût di viodi rosis e plantis che al è dificil cjatâlis in terens e in situazions normals. E mi soi dit ogni volte:"Cjale ce fuarce, ce istint di vite!". Al è come se o ves dit: "Cjale ce fede!". Parceche Diu nol è dome veretat, al è ancje vite e là che e jè vite, ogni sorte di vite, e jè partecipazion a Diu, ancje se no te maniere che a intint par solit la teologje catoliche, che e à di de fini e cataloga dut e che no pò vivi cence schemis e etichetis. (Pre Toni Beline, La fadie dal crodi ,pag. 145)
Nessun commento:
Posta un commento